قصيدة شعر شعبي للشاعر كاظم ال جابر السماوي

[عمرو بن معد]

[c شعر شعبي (( للسماوه ))


هذه القصيده للشاعر كاظم ال جابر السماوي

لحنينه الى محافظته السماوه واهلها
ومن غربته المؤلمة كتب هذه القصيدة
بعض المفردات تكون غريبه الا لاهل السماوه لانها من مختصاتهم

للسماوه
.........
حنت للسماوه الروح تاليها
صحت ياقوقتي وصاحت فخاتيها
.....
فخاتيها تنوح بدار مهجوره
تريد اتطير والجنحان مكسوره
هيمه وگاع صبخه وكلها مخطوره
وعلى هروشي من امس نشفت سواجيها
........
سواجيها شحيحه ويرفس الظامي
يعت بيه الحنين وترجف اجدامي
گبل چانت رشَن بستان الايمامي
وشبع عجد الطويل بريع جاريها
......
جاريها صدر وذراع للملگه
يجي من الغربي يبچي ويحظن الدنگه
مثل حال الغريب الرد بعد فرگه
يشبگها لحد مايطفح اعليها
......
عليها الروج غافي ويحسب ايامه
وبٌفي الجسر خدرانه الابلامه
شحلات الروف وكت المغرب انسامه
مصفوف النخل طوگ ابچواليها
.........
چواليها ويطرها الناحل بطوله
من كتر السكله ويون ماصوله
يطر الروف للحدبه اعله هلهوله
ويصفجله السعف لمن يطر بيها
...........
يطر نخل السماوه ويلچم ابجرحي
يذب حمل الّبريم و گفة البرحي
گبل حري ويفوت ويغسل ابملحي
واشربهن دبس واغفه اعله حريها
..................
حريها الثخين ويغفه كل حادي
المشمش فوگ راسه وحظن الاجوادي
يغازل والزلوف وگذلة الشادي
وكصايبها السعف تلبك تراچيها
....................
تراچيها السماوه انجوم گمريه
من صوب الزغير وكلها مضويه
يروح الروج للقشله ويرد بيه
اويذبنه ابشارع الستين تاليها
................
تاليها وتطر من الفجر عشاگ
تروش الناس بالربضه بحلو المسواگ
وافر خيرها وراگ اليطگ ابراگ
والزبلان منفوخه ونرد بيها
.......................
نرد بيها ونبگ مطلگ يزمها اسلال
حربيه ابگفاه لوگوجه لوچقال
وين الحال هسه او وين اذاك الحال
تبدل كلشي هسه وراح ماضيها
................
ماضيها من اذكره اتشب حنايا الروح
هسه الناس غربه وحل عليها النوح
مابين انخطف لومات لو مذبوح
وحاميها صفه ابسبة حراميها
..........................
حاميها تنحه وامس بيده الزود
امئمنه الناس ومئمنه الليالي اعجود
يمته ايعود ذاك الخير يمته ايعود
وتلمنه اعله كتر الشط محاچيها
.....................
اعله كتر الشط حمام وغاگ فوگه ايطير
واحنه ابها لدشايش السمرعالجير
ياسيد جليل اهنانه فد تصوير
فدوه مروتك للذكرى خليها
......................
خليها اعله عين الماحسبنه ولام
من عجد العرايه العجد ابن ايدام
لوزفة عرس جوگات للحمام
وشوف اشلون من نتعرين اعليها
.....................
نتعرين نطب ومتربين الروس
وابن صنكر يغني من ندك بالطوس
وينك ياحميد انصيح ماكو فلوس
ويّصيح حميد اشلون تاليها
..........................
تاليها ونرد مثل الفراش نروش
نلعب بالقبق يم حايط ابن احنوش
لو روجح وطمه وگوش يللي تگوش
لودعبل وطنب ونگد اعليها
.....................
لودعبل واذا راح انغلب تنلاص
اخلي الصول بيدي وصحت اريد ارواص
لو وياي ربعي وباص يطي الباص
لو العب اچعاب وگلت الچ بيها
.............
الچ مرصوص وين الگام ويدگه
وين الندبته الصچي ويرد حگه
واذا يلعبها سنه انطرده ونغبگه
واذا عاند تصير ابدك تواثيها
.............

نلعب واللعب ماينشبع منه
جنه وراحت ومنهو اليرد جنه
نذر لبن الحسن يوم الترد النه
عرايه اصدور للردت نلاكيها
...........
نلاكيها اعله ذيج اسطوحنه الجلده
ننام الحاف واحد والهوى امخده
موشده الفگر بس الحزن شده
نضحك للكمر ونجوم نغويها
.................
نغويها ويمر برد السطح نسمه
نحسب بالنجم نجمه ابأ ثر نجمه
نغفه اعله البواري وكلمن بهدمه
وتكعدني الشمس رمضان اجه اعليها
....................
اجه رمضان هسه وكل يشد حيله
يامحله الليالي وليله الف ليله
نسهر ماننام انتاني ابو اطبيله
وعلى خف التنك تركص صوانيها
.....................
صوانيها بصباح العيد فرحانه
كاكول وكعك وكليجه مليانه
يم دولاب نوني العيد يلكانه
وتاخذنه الفرح لهفه ونرد بيها
...............
نرد بيها ابربل وچياسة الديري
صفكات وهلاهل حد الاخضيري
اطبع فوك بابه الخضره تصويري
ونرد للسينما ابعشره ونطب ليها
.................
ليها وبيها واعليها الوكت محلاه
بعجد الداحره وعجد العرايه اوياه
ويم عجد السبوس الخير نتلكاه
وللشرجي نرد نتكشخ اعليها
.................
للشرجي نزفهه الحد عجد دبعن
صواني الخير للمحتازهه ايلمعن
نطر عجد النجاجير وكرم طبعن
اذا كهوة احسين الهيل چاسيها
..................
چاسيها ابعطرها الماي وبگيشه
والطير اليمر لازم يذب ريشه
اذا يعطش جريب ويم حمد عيشه
زبيب احمر عسل والچبده يرويها
..................
يرويها ويشم طعم البگه بذوله
من حمزه الكببچي ولبن دندوله
لوجودي وعبيده ونفر عازوله
من كبة مسافر والعدس بيها
..............
وين ايامنه الحلوه ومنو يردنه
طشرنه الوكت هسه وتفرهدنه
كل واحد تحت نجمه وتباعدنه
وغم هذا العمر بالذله نكظيها

Enter][/center]

[أبوعمرالسلطاني]

قصيدة مفعمة بالمفردات الجميلة والمعاني الحلوة شكرا لك أخ عمرو

[ادارة الموقع]

مشاركة جميلة مشكور ابن العم الغالي عمرو على هذه القصيدة الشعبية الرائعة و مفردات جميلة

[المحامي سيف ال سدخان]

والله يا اخ عمر هذه القصيدة اكثر من رائعة وهي لا تخص السماوة فقط بل تشمل كل مدننا لمل فيها من مشتركات الحياة البسيطة التي ننضر لها الان بمزيد من الحنان والشوق مع تعقيدات هذا العالم الجديد.....مشكور كثيرا

[عمرو بن معد]

شكري وتقديري لاولاد عمي الكرام على اطرائهم واسعدي والله وافرحني لانها دخلت الى قلوبهم
والشكر الجزيل لادارة الموقع لانها نشرته على موقع القبيلة في الفيس بوك وانا لي مشاركات ايظا في
موقع الفبيلة بالفيس بوك باسم اسامه عمرو العراقي.
اسال الله العظيم رب العرش العظيم ان يمن عليكم بالصحة والعافية ودخرا ومفخرتا لقبيلة البو سلطان
والسلام عليكم ورحمة الله وبركاته.

[كريم السلطاني]

شكرا على الموضوع الرائع
ننتظر جديدك يا مبدع
تقبل مني مروري البسيط

[أبوعمرالسلطاني]

قصائد تعبر عن بيئتها صح لسان شاعرها وتسلم أيد كاتبها