قصيدة يا شعلان للشاعر السيد سعيد الرميثي

[سالم الهزاع]

السلام عليكم

هذه قصيدة رغم أنها قديمه اي في بداية التسعينات ألا أنها باقيه في قلوب متذوقين الشعر الشعبي

القصيده للشاعر السيد سعيد الصافي الرميثي ابن مدينه البطل شعلان ابو الجون

انقلها لكم وفي الأسفل تجدونها كمقطع فيديو على موقع اليوتوبي



ياشعلان

زيح تراب كبرك كوم
بسك ما كفاك النوم يا شعلان
يلكاف الخمر والجوخ وعبيدان
يا وسفه لبست الجفن وتغطيت بالتربان
ويا وسفه اطلعت مديون يا ديان
زيح تراب كبرك كوم
بسك ما كفاك النوم يا شعلان
يالطولك منارة ولو حجيت وذان
تاليها لحد ضمك عجيبه شهالكصر كصران
يالعيونك لضى من تشيط
وبيهن ما نفرز النار والدخان
كرب تنوركم لو شب
لجبود السمه حلكه يمد السان
واذا لمعت صوانيكم
تضحك معدة الجوعان
وتاليها اطلعت مديون يا ديان
بسك ما كفاك النوم يا شعلان
ريح الكيض يبس ريج دلتكم
وسافه وزنجر الفنجان
وذاك الضيم رد لهلك مثل ما جان
كسرو عود بيرغنه ومهوال العشيره انهان
بسك ما كفاك النوم يا شعلان
شلون تموت واحنا البيك زامطنه
يخناك المنايا ومن يكول تموت
انته ابن الصميده النادبه ذو النون
ومن سمعت بطاريه
زاعت كل بطنها الحوت
شلون تموت
يا طالوت
يالصدرك درع داوود
يالعابر بحور الموت
يا طالوت
من طكات مكوارك وكع مذهول جم جالوت
يالبضهر النهار ويا العده تلاكيت
لا بوكه ولا بسكوت
عندك بالسوير شهود
ويشهدلك جسر بربوت
يزتات الزلم لو هندس جويريد
ما ينرادلك زاتوت
دنهض يا ثخين الصوت يبن عناد يالما والمك تابوت
يالمخورس حلوك الزان صيح بصوتك الزلزال
يا شعلان
وفزع كل عشايرنه يعالي الشان
بني هاشم بني حجيم وجنانه وعزة وزبيدات
عبس جبشه الجبور بدير والكرعان
جياش وشبل وعبيد
اعاجيب وخزاعل عامر وحسان
ازيرج والخفاجه عبوده وعكيلات
بني لامي السواعد منتف الزياد
والصفران
الاحلاف وبني طرفه
بني والي بني عبود تميم وغانم
وفرطوس والبيضان
بهادل والشويلات بني مالك وطفيليه
كعب ودليم اسد وزهيري وحمدان
ركابه والجوابر عيسى والمياح
حِسن شمر بني كنعان
بني زريج وبني عارض وبني سعده
ضفير تكور والسودان
غريري ومنشك وخيكان
بسك ما كفاك النوم يا شعلان
نايم يا جعيد الراي
تحزم بالجفن يا حيد وزيح تراب كبرك كوم
بويه مرجي بكوسر الديوان
مكوارك مغندب ومهضوم
حل وكت الملاكه وساعتك حلت جا المن بعد مضموم
هدل الرسن خل يهدل بمهرك لو لثك حيدوم
تدك دك صدرك وعيب عليك تثاوب كبال الكوم
نايم يا صكر يا حيف والغربان بربوع العراق تحوم
ياجيثوم
تفز مرعوبه لندن لسه من حلمك تسولف بيك يا جيثوم
بويه يالمابيك شي مذموم
بسك كوم
صار سنين عدنان بشواجيره الفشك مفطوم
شنهي العطلك لساع ما عندك خبر وعلوم
هاي اهل الروايه السود تكوم تلكه خطارك
مدلها الغلايج كوم
هاي اهل الروايه السود اجتك يا سهيل نجوم
والباعو قضيتنه
يضل عار البعث بكصصهم ليوم الحشر مفطوم
يا رمز الثورة والثوار يا شعلان
بطن الجابتك حره وشريفه وجابت الشجعان





اتمنى ان تنال رضاكم

مع التحيه

[الشيخ ابوسند حيدر الفاضل]

مشكور ياهزاع
فهذا هو العراق فشعلان هو العراق وكل عراقي حر هو العراق كما قال شاعرنا

يا طالوت
يالصدرك درع داوود
يالعابر بحور الموت
يا طالوت
من طقات مقوارك وقع مذهول جم جالوت
يالبضهر النهار ويا العده تلاقيت
لا بوقه ولا بسقوت
عندك بالسوير شهود
ويشهدلك جسر بربوت
يزتات الزلم لو هندس جويريد
ما ينرادلك زاتوت

[المحامي سيف ال سدخان]

اول مرة اسمع هذه القصيده وانبهرت لكلماتها وما تحمله من معنى عظيم .......مشكور جدا على جعل هذه الملحمة بين ايدينا......

[سالم الهزاع]

منور في الصفحة يا ابومخلد وأهدي أليك رابطة القصيدة الكاملة والتي الجزء الثاني منها يجاوب الشيخ شعلان من ناداه وطلبه


http://www.youtube.com/watch?v=QtmmFlEZrYs

[المحامي سيف ال سدخان]

مشكور اخي العزيز ...الرابط وصل

[الشيخ ابوسند حيدر الفاضل]

مضيف اليرد الضيف خأل يصلب ضميره بخشب بيبانه
وصكر المايطيح بوم جاه شنهو النفع من خفك جنحانه
ومركب اليرطه الروج قلة فهم ربانه
ويستاهل يكطه السيف راس الباع وجدانه

[خليل الجبوري]

بسك ما كفاك النوم يا شعلان
نايم يا جعيد الراي
تحزم بالجفن يا حيد وزيح تراب كبرك كوم
بويه مرجي بكوسر الديوان
مكوارك مغندب ومهضوم