قصيدةالشاعر عبد الامير محمود الجبوري - موال خماسي
قصائد شعر نضمها الشاعر عبد الامير محمود الجبوري شاعر الحله الفيحاء بحق الشيخ عائد فاضل خلفه الحسن الصياد - البوسلطان قبل هجرته الى خارج العراق :
موال خماسي للشاعرالمرحوم عبد ألأمير محمود الجبوري ( ابو قيصر ) رحمه الله ..بحق الشيخ عائد فاضل خلفه الحسن قبل سفر الشيخ من العراق الحبيب
عندي ولف لو مشه جا لملك سلطاني
سلمته روحي وهو مكروب سلطاني
أوسلط علي~ عدوي شلون سلطاني
ظالم بحكم الغرام الما ورا عايد
هيهات اصافح بعد واحد وله عايد
بس الذي منبعه طيب مثل عايد
واليوم من فاضل الطينه نبع فاضل
وكل ألأجاويد تشهد بي رجل فاضل
يا سعد حض العشيره وشيخها فاضل
يا خلفة الخير خلٌف من أعز خلفه
اوتتنومس الناس حتى لو مشت خلفه
سجله التاريخ إسمه بالشرف خلفه
امصيٌت شبه والده صاحب الوجه الحسن
يحسن على الناس من فضله وجود الحسن
لا باس بالعود لو سمٌوه خلفه الحسن
منعوت أصل وفصل واللقب سلطاني
حضرة ألأخ الكريم الشيخ عايد الورد اقدم لك هذا الموال الخماسي وذلك ما لمسته من شخصك الكريم خلقا وخلقا ومنطقا وفقك المولى تعالى لما فيه الخير والسعاده يا نبراس آبائك وأجدادك ألأطياب دمت لنا أخا سعيدا وشكرا .
المخلص
عبد ألأمير محمود الحسن الجبوري
1 / 5 / 1992
ابيات شعريه كتبها الشاعر المرحوم عبد ألأمير محمود ( ابو قيصر ) بأسم الشيخ عائدفاضل ألخلفه الحسن بتأريخ 16 / 10 / 1991
كلكم راع وكلكم مسؤول عن رعيته
يا قلم سجل ابتاريخ الوطن اغصان ها لشجره ألأصيله برعمن
ش شجرة من ألأصل ممدوحه ابعز اهلها فاخره و مملوحه
يا هله بغصان هاي الدوحه بعدما برعمن كلهن فتحن
ي يضاهي هالغصن كل ألأغصان اعدل امن البان ومن الخيزران
حين ما كوضن لوعات الزمان كل معالمها ابسعاده اتغيرن
خ خبر اثلج اكلوب الطيبين وانعلم عله السلف ها لشاب الرزين
للرعيه انشالله حصن المتين بالكرم للضيف حاتم بو معن
ع عطر الخير بالأجواء فاح واشرق ابوجه الأرض نور الصباح
صحنه هذا اليوم حيه عله الفلاح وبالهنا طيور المحبه غردن
ا اشكر اواحمد الباري العظيم ابرتبته المحروس ابو كلب السليم
استارث المنهاج من جده القديم ورث طيب مو ورث خضر الدمن
ي يغار البان من طوله الجميل يميل وي هبوب نسمات العليل
طابو حبه والسجل وسط الدليل كبل هزات المهد كلبي علن
د دار الحكم من جده اله اومنهج الوالد الفاضل مثله
وبيرغ الباشيه بجفوفه حله مصيت ابيوم الملاحم والفتن
ف فصيح الكوم بالباشيه ثوب وامفصل على راعيه
ذهب صافي اوله اوتاليه اوهوه اغله او اغله من غالي الثمن
ا افضل يوم رد ألأعتبار والملك رد لا هاليه ألأحرار
او راية الملفوفه تخفج على الدار ويا حياة العزه تحفظها السنن
ض ضوه البيت واكباله المضيف نور وجه الشيخ ابن خلفه الشريف
هم عفيف وهم لطيف وهم ظريف بسمه يالخالات كومن هلهلن
ل للحك لوح ابجفه الشهم بصوره رسميه وحسن نيه وعزم
ها لليالي البيض يضون جالنجم والليالي السود ولن وهربن
أ أهل الفاتحه ما تنكر أهم اصحاب الصداره والفكر
تعمل المعروف بدروب النصر والاعمال الطيبه ما ينسن
ل للوادم على الطيب حكوك وللرعيه ينظر بنظرات الشوك
حتى كلما يعتلي سرج السبوك إتعبد كلها مثل عباد الوثن
خ خيار الناس تشهد والبشر بالمضايف شانها دروس وعبر
جانن وراحن او ردن بالفخر وصارم الحاضر من سيوف المضن
ل لا بد للفرع منبع اصل والفرع بالأصل لازم متصل
عادة الثعبان ينزل نه صل والأفاعي مثل هذا الصل ربن
ف فرات ألأصل لجود الرجال كرسوا عمارهم بأحسن خصال
بالدواوين اصبحوا مضرب امثال الما يصدج يخسه ويجدم رهن
ه هنيئا الك يا عين الشباب بالوسام الحل على صدرك وطاب
يا طويل العمر يا زاجي ألأنساب ها لسنين الخير بسمك حولن
أ أنت الغانمه أهل وامحل ورايتك رفت قمة جبل
حاكم الما يحكم بعلم وعمل جفنه ما يغمض ولا يذوك الوسن
ل لايك لك تره الملبوس كز يا من عيونك الحلوه عيون وز
انت والأخوان من كلبي أعز حيث لنك شاب طيب مؤمن
ح حرت وشلون اوصفك بالجمال يا غزال البيد يفداك الغزال
نور وجهك كمر بو طاعة هلال من تمر مره ابمحاربكم ضون
س سلوة أمل دومك للضيوف ابخدمة الخطار لو جانوا ألوف
ما تهاب الموت ياسمح الجفوف لو زمور التفك بالملعب دون
ن نلت المرتبه وتأرخت والعشيره نالت العز والبخت
وجمعت حروف التهاني وبخبخت ( شيخ عايد فاضل الخلفه الحسن )
والختام أدعوا بعلم يوم الغدير يحفظ ألأستاذ فرهود المدير
حتى ولده من الصغير للكبير بالستر والعافيه طول الزمن
اخي الفاضل نجل الفاضل شيخ عايد المحترم اقدم هذه ألأبيات البسيطه بأسمك الكريم وذلك بمناسبة ألأعتراف بالمنصب الوراثي من ابيك وجدك الشيخ خلفه الحسن مع التهاني وشكرا .
عبد ألأمير محمود ( ابو قيصر )
16 – 10 - 1991
