سالفة اليوم هي سالفه ولها طبعا قصيده والقصيده معروفه ولكن السالفه الكثير مايعرفونها
هذا دغيم الظلماوي من شمر من اهل قفار كان شاعر جيد وكان كريم والكريم وجه الله
ويوم من الايام وهو قاعد على جال الضو ومعه ولد عمه يقاله (كليب)
وقعد يقصد ويقول
ياكليب شب النار ياكليب شبه= عليك شبه والحطب لك يجابي
وأنا علي ياكليب هيله وحبـه = وعليك تقليط الدلال العذابي
الوالمه ياكليب عجل بصبـه = والرزق عنداللي ينشي السحابي
وإدغث لها ياكليب من جزل خبه = وشبه ليا منه هبا كل هابي
أبي ليا شبيتها ثم قبه = تجلب ربع سرات(ن) غيابي
بنسرية(ن) ياكليب صلف مهبه = ليا هب نسناسه تقل سم دابي
متكتفين وناطحين مهبه = متلطمين وسوقهم بالعقابي
صبه لقرم صرفته ما حسب به= يوم البخيل مكنهب الوجه هابي
وصبه لمنعور من جاه نبه = يرخص بعمره والدخن له ضبابي
وعده عن اللي مايداري المسبه= اللي يدور بالقصير الغيابي
لياباطن الهلباج خطو الجلبه= يازين تالي الليل خبط الركابي
افرح لهم وابدي سلام المحبه =ليا شح بالهين كبير العلابي
سلام احلى من شخاليل جبه = واحلى من السمن الجديد الرعابي
وخطو الولد يوم الملاقا نكبه = يصير معنا من حساب الزهابي
وش عاد لو يلبس زبون وجبه = معيرة على غضير الشبابي
أنا لقيت الصبر يازين غبه = يرقيك روس مشمرخات الهضابي
ومن لا صبر ياكليب في حكم ربه = هذاك يوم البعث ماله ثوابي
الوالمه هي (الدله) وطبعا من كلامه نفهم ان دغيم الظلماوي
يولم دله ويخليها احتياط اذا جاه ضيف والا سبحان الله
وطبعا ياجماعه القهوه ماكانت سهله يعني من الي عنده قهوه ذيك الايام ؟
واشتهر دغيم الظلماوي بعدة اسامي منهن
راع الوالمه
متعب الدلال
كان الي يحكم نجد هاك الايام هو (محمد العبدالله الرشيد) وسمع عن الظلماوي وغار منه
لان الكريم يغار اذا جاء طاري واحد كريم
وقال هين يالظلماوي والله لا اوريك
ويجي يوم من الايام وقال لاخوياه اسمعو
الليله نبي ناصل مشوار
قال ابشر وحنا جاهزين
ويوم جو بالليل اخر الليل وهم ينخون ركابهم عند الظلماوي
ويتلطمون ويقلطهم
ويوم قلطهم وهو ياخذ الملقاط ويحرك الجمر ويطلع الوالمه
قام الظلماوي ومد يمناه لابن رشيد وقال الابيات ذي المرتجله
مده رهن لولاك ماقلت ياكليب=ولا قلت شب النار وصر موقد(ن)له
يابو الارامل والعذارى ومن عيب=وابو من صار العصا ثالث له
ويابو المحرول والعمى والمحاديب=ومن ضامته بقعا تصير ولد(ن)له
يالجوهر الناريس يالمسك يالطيب=ياعنبر من جربه مايمله
تقفي محاليب وتملى محاليب=وكبد تيبسها وكبد تبله
ياطير شروى مالقي بك عذاريب=لو تستحي ماتجمع الطيب كله
وان كان هرجي به عليكم عذاريب =سامح عسى الي عقبك بالف حله
ياناس القصيده ذي مرتجله لاحظو البيت ذا
ياطير شلوى مالقي بك عذاريب .........لو تستحي ماتجمع الطيب كله
الله اكبر
المهم ابن رشيد انتفخ راسه وبعذره لو اني منه والله لااعطيه الحكم
<===== ايه هين
وقال ابن رشيد
يالظلماوي والله ماتشري القهوه كثر ماشريته
معنى كلامه
انك متى مابغيت قهوه تجين وانا اعطيك الي يسدك لمدة سنه
وعلى هالحال الين اموت
وفعلا اوفى بالي قال
والظلماوي شاعر مهوب بسيط وكريم الى ابعد الحدود وكان عقيم الله يرحمه
وسلامتكم واسف على الاطاله
وللحرية الحمراء باب بكل يد مضرجة يدق
التعديل الأخير تم بواسطة أبوعمرالسلطاني ; 02-07-2012 الساعة 11:44 AM