ابناء عمومتي تحياتي
هذه القصيدة كتبتها الى الانسانه التي ملكت
الروح والحشا وتربعت على عرش قلبي
ارجو ان تنال رضاكم مع الموده
لو شمعه اشعلت انت بتوالي الليل
هذا الفضل ليه ومو الك تدري
لأن اني الشعللك كل سنينه اشموع
كل اللي عملته وما نفذ صبري
متأمل تجي ايردك هوى العشرين
قدر صرت انه الك وانت الصرت قدري
ابد ما حركك كل العملته وياك
متأسف صدك جي ضيعت عمري
لأن سرك علنته ودرت بيه الناس
أذن ما راح اكوله واعلنه لسري
يالمالك امان وبالعشك جذاب
ولك اصبح ظلام بشوفتك فجري
فوك هموم كلبي اجماله اجتني هموم
خلني انوح وكسرن ظهري
تعبت السنين وتعبتني وياك
وروحي التعبتهه وشتت فكري
الك كلبي شطرته بالعشك شطرين
شطرك اخذ ه انت ورد اخذ شطري
كالولي اكفرت تعشك ولف مغرور
كلت والله احبه وقابل بكفري
سلمتك كليبي وكمت توجر بيه
شكثر حبي عظيم السلمك امري
جبست الجروح بملح مابيه يود
خضر لك ورد خاطر تشم عطري
أذن خلني اقارن بين حب اثنين
حب مبني بغدر والثاني حب عذري
الك عمري نطيته وكل سنين اصباي
وانت من الطفوله اتحضر لغدري
نحرك جنت ابوسه وحيل اشمشم بيه
وانت بكل وكاحه اتعضعض بنحري
ورغم هذا الحجي وكل المرار البيك
محتاجك انه ويشتاك الك صدري
ليهمك حبيبي اشعل النيران
من ازمان نارك بالكلب تسري
بس اكتب شعر كضيته عمري وياك
موال انظمتلك وانظمت هجري
قصايد ياما كثره اشكدالك وديت
مارديت ابد تستهزيء بشعري
هذا انه انتظر لسه وبعدلي اسنين
لتظن عجزت لا ما نفذ صبري
واذا تالي العمر تتصدق اببيتين
يعني اني الربحت وحققت نصري
واذا ماجن ابد حد ما لفاني الموت
بدلهن حزن بس خطهن بكبري
هلبت من يجي وايشوف ملج الموت
يمسحهه الذنوب لخاطرك تدري
لكم مودتي وجزيل شكري
الشاعر
عماد السلطاني