ابناء عمومتي الاعزاء تحياتي
اهديكم قصيدتي هذه ارجو ان تنال رضاكم مع التقدير


(القصيدة)



بالك للعتب لا تفتح الباب
تخسر لو قريت شبيها الظروف

زلاتك جثيره وخايف اعليك
ماتحمل ركبتك حز السيوف

اذبحك بالنقط لاتعتب وياي
لذلك ما احطهن فوك الحروف

واذا احجي جمل معناها انهيك
الصراحه اجروح ما ينفعها كل روف

ادري بداخلك متراكمه اسرار
واعرف عني تخفي اسرارك بخوف

اشما تخفي وتحاول اعرف شبيك
بسبب نظرات عينك صرت مكشوف

صدك بس تصدلك عيني تقراك
من يعله الشجر ما يستر الطوف

وانت اغصان سرك علن الفوك
كل الزين اشوفك انت متشوف

مو من صالحك تتعاتب وياي
واحذر ما اضل للدوم مجتوف

اطك اجتاف صمتي وافضح البيك
وادكلك طبل واترن الدفوف

صح انت نهر بي طافح الماي
بس انه الحضنته وصرت اله جروف

وادري انت قصر عالي الحياطين
شنو نفع القصر لو جان مكشوف

قصرك لو تعله بزودي ياصاح
لان عوج المحاني القصرك سكوف

يعني بلا وجودي بلحظه تنباك
وتصير ابسط هدف للرايد ايحوف

سيف انت نعم بس ما الك صيت
جماد السيف اذا ما هزته جفوف

يعني الامر بيدي اتعيش وتموت
واذا رايد تعيش الامر موقوف

على طيب وصراحه ونبذ الاسرار
وما تنكر ابد كل عمل معروف

وارجعلك واكلك عوف العتاب
طفل بيه العتب بالقهر ملفوف

انه مرضعه دمع وامنومه عالاه
ودلول اليحبها مغمسه باوف

وهسه انت تريد اتكعده معقول
يهيج وللعتب صدكني ميعوف

خله بنومته ولتفززه ارجوك
شيسكت الرضيع اليفز مصدوف

ما يقنع عنيد بحلو الجلمات
ولا يحطهن هذني بجيب مزروف










الشاعر
حسام السلطاني